Журналистер «Aikyn media open»-де бақ сынады

Журналистер «Aikyn media open»-де бақ сынады
Фото: Айқын газеті

Алматыдағы Оқушылар сарайында журналистер мен блогерлер арасында шахматтан турнир өтті. «Aikyn media open» сайысына жалпы саны 30 адам қатысты. Демалыс күнін тиімді пайдаланған БАҚ өкілдері ой сергітіп қана қоймай, ұйымдастырушылар тарапынан берілген сыйлықтарға ие болды.

Еліміздегі беделді басылымдардың бірі «Айқын» республикалық қоғамдық-саяси газеті 13 жылдық мерейтойына орай осындай шараны қолға алды. Төртінші билік иелерінің басын қосқан турнирге жас журналистерден бастап ардагерлерге дейін қатысты. Ойын швейцар үлгісінде өткендіктен, жеңіске жету мүмкіндігі жоғары еді. Яғни жалпы саны 7 турда жинаған ұпай сандары есептеліп, қорытынды шығарылады. Суырылып үздік шыққан тілшіге «Air Astana» әуекомпаниясы Тегеранға бизнесс-класқа екі билет табыстады. Жеңімпаз аталған жолдамамен Иранның астанасына осы жылдың аяғына дейін қалаған күнінде бара алады.

Осыған дейін БАҚ өкілдері арасында өткізілген талай турнирде топ жарған Арсилан Алахуновқа бас жүлде бұйырды. «Ұйғыр авази» республикалық қоғамдық-саяси газетінің тілшісіне ғана есе жіберген жас блогер, шахматтан І-рарзрядқа ие Қуаныш Сүлейменге екінші орын бұйырып, «Кернеу Limited» атынан планшет табысталды. Қола жүлдеге талас қызу болды. Жарыс қорытындысында ұпай сандары тең түскен төрт ойыншыға да үшінші орын берілді. Дегенмен коэффициент бойынша Құмар Бақдәулет басым түсіп, планшет иегері атанды. Сәйкесінше, Байпейісов Асқат, Қаматаев Қанат пен Түсіпхан Нұрбек есімді журналистер де жүлделі үшінші орынды иеленді. Бұдан бөлек белсенді қатысқан бірқатар тілшілерге бағалы сыйлықтар табысталды. Сонымен бірге Нұртөре Жүсіптің «Мың құмырсқа және БІЗ» кітабы мен Ермахан Шайхының «Қоңыр қажының күнделігі» кітабы келгендерге үлестіріп берілді. Шахмат турнирін өткізуді дәстүрге айналдырамыз дейді газет басшысы.

Нұртөре Жүсіп, «Айқын» газетінің бас редакторы:

- Газетіміз биыл бір мүшелге келіп отыр. Осы айтулы мерекені қалай өткізсек деп көп ойландық. Нәтижесінде шахматтан турнир өткізуге бел байладық. Бұл арқылы журналистердің қолынан шахмат ойнау келетінін көрсетіп, мықтылар ойынын кеңірек насихаттағымыз келді. Елімізге белгілі жас шахматшы Жансая Әбдімәліктің шахмат академиясы ашылды. Ұсынысымызды жерге тастамай, осы жерде өткізуімізге келісім берді. Осы шараның өтуіне ат салысқан барша жандарға алғыс білдіргіміз келеді. Турнирді алдағы уақытта дәстүрлі түрде ұйымдастырып тұрамыз деген жоспармыз бар.    

Аян Нысаналин, ардагер-журналист:

- Мұндай шаралар жиі ұйымдастырылып тұруы қажет. Себебі күні бойы жұмыстан бас алмайтын журналистер бір сәт сергіп қалғандары жақсы. Шахмат - ойы–дардың төресі. Өз тарапымнан айтар ұсынысым бар. «Айқын» газетінің ұжымы келер жылы тағы өткізетін болса, турнирді Тәкен Әлімқұловтың құрметіне қойса екен. Өйткені қаламгер-журналистер арасында дәл Тәкен ағаға тең келер қарсыластар болмаған. Өз арамызда кішігірім сайыстар жиі өтіп тұрады. Ардагер болсақ та, мүмкіндігінше қатысамыз. Ұйымдастырушыларға рахмет айтқым келеді.   

Ө. Сансызбай