«Australian Open». Әйгілі Джокович өзбекстандық теннисшіден ұтылып қалды

«Australian Open». Әйгілі Джокович өзбекстандық теннисшіден ұтылып қалды
Фото: ausopen.com

«Үлкен дулыға» санатына жататын «Australian Open» жарысының 6 дүркін жеңімпазы, әйгілі теннисші Новак Джокович биылғы жарысты ерте аяқтады. Ол Аустралия ашық біріншілігінің («Australian Open») екінші айналымында өзбекстандық теннисші Денис Истоминнен ұтылып қалды.

Новак Джокович пен Денис Истомин арасындағы ойын 4 сағат 48 минутқа созылды. Нәтижесінде «АТР» рейтингінде 117-орында тұрған өзбекстандық теннисші басымдығын байқатып кетті. Корттағы тартысты ойын 7:6 (10:8), 5:7, 2:6, 7:6 (7:5), 6:4 нәтижесімен Денистің пайдасына шешілді. Новак Джокович ойында 72 рет қателікке бой алдырды.

Серб теннисшісі «Үлкен дулыға» санатындағы турнирлерде соңғы рет 2008 жылы ғана екінші айналымда ұтылған. Одан бергі аралықта фаворит екенін дәлелдеп келген-ді. Өткен жылы дәл осы «Australian Open» турнирінде жеңімпаз атанған еді.

Ө. Сансызбай