Қазақстандық боксшы Назым Қызайбай Қытайдың Цяньань қаласында өтіп жатқан Олимпиадаға іріктеу турнирін ерте аяқтады. Отандасымыз бес дүркін әлем чемпионы, Лондон Олимпиадасының қола жүлдегері атанған үндістандық Мэри Комды жеңе алмады.
51 келіге дейінгі салмақта жұдырықтасқан боксшылар жекпе-жегінде төрешілер 1:2 (27:30, 30:27, 27:30) есебімен үндістандық Мэри Комды жеңімпаз ретінде таныды.
Ал 60 келіге дейінгі салмақта бақ сынап жатқан Назым Ишанова бірінші айналымда тонголық Фифита Пуекиді 3:0 есебімен жеңіп, ширек финалға шықты. Енді ол осы салмақтың үздігі саналып отырған қытайлық Жинхуа Юнмен кездеседі.
Бүгін ерлер арасында Жәнібек Әлімханұлы да жарыс жолына шықты. Ол жапон боксшысы Макато Такахашиді айқын басымдықпен жеңді.
Айта кетейік, кеше Дариға Шакимова мен Абылайхан Жүсіпов бірінші кездесулерінде жеңіске жеткен болатын.