Қазақстандық кәсіпқой боксшы 22 қаңтар күні шаршы алаңға шығады

Қазақстандық кәсіпқой боксшы 22 қаңтар күні шаршы алаңға шығады
Фото: vk.com

Қазақстандық кәсіпқой боксшы Бахтияр Эюбов спорттық мансабындағы оныншы жекпе-жегін АҚШ-тың Аризона штатына қарасты Тусон қаласында өткізеді. 2016 жылдың 22 қаңтарында өтетін жекпе-жекте отандасымыз жергілікті боксшы Джаред Робинсонмен жұдырық түйістіреді.

29 жастағы қазақстандық боксшы соңғы жекпе-жегін 29 қазан күні өткізіп, вирджиниялық Антонио Чавес Фернандесті бірінші раундта-ақ техникалық нокаутпен жеңген болатын. Осыған дейін өткізген тоғыз жекпе-жегінде де Бахтияр Эюбов мезгілінен бұрын жеңіске жетіп келеді.

Бахтияр Эюбов пен Джаред Робинсон арасындағы жекпе-жек 8 раундқа жоспарланған. 33 жастағы америкалық боксшы осыған дейін 16 кездесу өткізіп, 13-де жеңіске жеткен. 2 рет жеңіліс тапса, 1 жекпе-жегінде қарсыласымен тең түскен. Сондай-ақ орта салмақта « United States Boxing Organisation» чемпиондық белбеуіне ие.

Қазақстандық боксшы жекпе-жек алдындағы ойымен бөлісіп, қарсыласы туралы да айта кетті.

- Мен кездесуге тыңғылықты дайындалып жатырмын. Мықты боксшылармен көптеп спарринг ұйымдастырудамын. Джаред Робинсон – осал боксшы емес, мықты қарсылас. 16 жекпе-жегінің 2-де ғана жеңілген. Көптен бері осындай боксшымен жұдырықтасуды күтіп жүргенмін.

Менің жоспарым - жылдам жеңіске жету. Бұрынғыдай қарсыласты шыққан бойда соққының астына алып, оңай жеңіп шығамын. Мен оны ақылды түрде мезгілінен бұрын жер жастандырамын, - деді Бахтияр Эюбов.

Бұл жекпе-жекті танымал «Show Time» арнасы тікелей эфирде көрсететін болады.  

Айта кетейік, Бахтияр Эюбовтың есімі қазақстандық көп жанкүйерлер үшін аса таныс емес. Ақтөбе қаласында дүниеге келген боксшы осыған дейін Әзірбайжан елінің атынан әлемдік аренада бақ сынайды деген де ақпараттар тараған еді. Кейіннен қос тарап өзара келісімшарт ымырасына келе алмаған. Бүгінде Бахтияр кәсіпқой бокста Қазақстанның туының астында өнер көрсетіп келеді. Биыл америкалық “Salita promoution” промоутерлік клубы қазақстандық боксшымен келісімшартқа қол қойды. Нәтижесінде боксшы алдағы уақытта ірі жетістіктерді бағындыруды жоспарлап отыр.  

Ө. Сансызбай