Токио Олимпиадасының танымбелгісі өзгеретін болды

Токио Олимпиадасының танымбелгісі өзгеретін болды
Фото: sports.ru

2020 жылы Жапония астанасы Токиода өтетін жазғы Олимпиада ойындарының танымбелгісі (эмблема) өзгеретін болды. Осыған дейін таныстырылған танымбелгі көшірме (плагиат) екені айтылып, дауға қалған болатын.

5 жылдан кейін өтетін Олимпиаданың танымбелгісі 24 шілде күні ресми түрде таныстырылған еді. Кейіннен бельгиялық дизайнер Оливье Дэби бұл танымбелгі Льеж театрының танымбелгісімен сәйкес келетінін алға тартқан-ды. ХОК қарауынан өткен кейін ұйымдастыру комитеті танымбелгіні ауыстыруды алға тартпаған еді. Алайда кеше өткен баспасөз мәслихатының қорытындысы бойынша өзгеретін болып шешілді.

«Олимпиада танымбелгісі ұлттың жан-дүниесін, дәстүрін, мәдениетін, салт-санасын таныта алуы тиіс» - деді Жапония премьер-министрі Синдзо Абэ. Сондай-ақ, ұйымдастыру комитетінің шешімімен келісетінін айтып, сәттілік тіледі.

Айта кетейік, Олимпиада танымбелгісінде «Т» әрібі таңбаланған болатын. Бұл әріптің негізінде «Tokyo», «Тomorrow», «Тeam» (Токио, "ертең", "команда") деген ұран бары айтылған еді. 

Ө. Сансызбай