Оқи отырыңыз

Тілекке еңбек тірек болмаса, ойға омалып қырдан аса алмайсың.

Автор: Бауыржан Момышұлы

— Редактор бағаны —

Байтұрсынұлы Нобель сыйлығы жайында
Байтұрсынұлы Нобель сыйлығы жайында

Автор: Ербол Жұмабайұлы

Статус: Massaget.kz порталының Бас редакторы

Материал жіберу

— Үздік әуендер —

Нұржан Тәжікенов - "Сағыныш"
Роза Рымбаева - Алтын сағым
"Тұран" тобы - Kara jorga - people's songм
"Тұран" тобы - The swan - N. Tilendiev
"Тұран" тобы - Kaiys's weeping - poems by S. Kudaiberdiev (the epic of 'Layla and Majnun')
"Тұран" тобы - Zharapazan - people's song - poems by S. Medeubek
Бас бет / Лайфстайл / Әдебиет / Поэзия / "...Күзге жалғыз барарымды кім білген?!"

"...Күзге жалғыз барарымды кім білген?!"

«Поэзияда генерал жоқ» демеуші ме еді?! Соңғы онжылдықта қолына қаламды серік етіп, өлең деген өлкеге қоныс тепкен жас ақындар бүгінде аға бола бастады. Солардың ішіндегі өз дауысымен келіп, алыстан дауысы жаңғырып естіліп тұрғаны – Ерлан Жүніс. Ерланның өлеңдерін оқып отырып, ақынның жан әлеміне енесің. Сонымен бірге қайғырасың, егілесің. Бойыңдағы сезімнің неше мың талшықтарын қозғамай қоймайтын Ерлан өлеңдерінің симфониясы сенің құлағыңда тұрады. Мұңдылау өлеңдерін жай оқу мүмкін емес, оған мұңдылау әуен қосып, ыңылдағың келеді. Сіздердің назарларыңызға Ерлан Жүністің соңғы жазған өлеңдерінің бір парасын ұсынып отырмыз.

Жаз да өтті, сұлу салған ән сыңайлы,

«Қош» деуге қалай енді жан шыдайды?!

Жаңбыр иісі... тамыздың тоңғақ түні

жапырақтың көзінен тамшылайды.

Ауық-ауық тұр, міне, себелеп түн,

себелекті келгендей өлең еткім,

жаңбыр иісі... ашылған терезеден

әнін шырқап қоямын көбелектің.

Әр тамшысын бірлеп-бірлеп санап түннің,

тезірек таң атқанын қалап тұрмын.

Көңілімде мұң да жоқ, шаттық та жоқ,

терезеден ешқайда қарап тұрмын...

 * * *

Сезім көп кеше кешкен, бүгін көшкен,

шығара алмаймын-ау бірін де естен.

Астында ақ көбелек қанатының,

бейуақ қызыл гүлдер күбірлескен.

Қызыл гүл, маған да айтшы, сырың қандай,

тотықұстың қанаты құбылғандай.

Астында ақ көбелек қанатының,

бейуақ болайыншы ұғынғандай.

Сырыңды мен алайын, жүрек көнсе,

көңілді тотықұстай түлеткенше,

екеуміз сүю жайлы сырласайық,

қанаты көбелектің дір еткенше!..

 * * *

Жауды ма күн, білмеймін, жауды ма өлең,

Жауғанына аңсарым ауды неден?!

...Жаздың соңғы түндері мөлт-мөлт етіп,

әр тамшының көзінде жәудіреген.

Жарқыраған дүние-ай, жасыл күнім,

Сенің жарқын жүзіңді жасырды кім?!

Жаз бойына қыратта гүл ашылса,

Жаз бойына жүректе ашылды мұң.

Ашылды мұң, бүр жарды мұңның гүлі,

Мұңсыз өткен есте жоқ түннің бірі.

Зердесіне салармын мұны кімнің,

Кеудесіне тағармын кімнің мұны?!

Бұл қалада бұлт маңғақ тау көрмеген,

Маңғақ бұлтты күз желі жәукемдеген.

Жаздың соңғы түндері-ай, қайтем сені,

Әр тамшының көзінде жәутеңдеген?!

 * * *

Жазың қайда, жапырағым?

Жаз әнін

сезіндік қой айта алмаудың азабын!

Сезім деген – шұғыласы бояудың:

Жасылын да, қызылын да, бозаңын,

Сарысын да, қарасын да, әппағын,

Жылдар бойы жүрегімде сақтадым.

Сан алуан сол бояулар ішінен,

Сені сақтап қалар түсті таппадым!

Жапырағым, жанарында күн күлген,

Тастай алмай, қош дей алмай жүрмін мен.

Сенің жазда қаларыңды кім білген,

Күзге жалғыз барарымды кім білген?!

 

Жолжазба

 

1.

Мына ауыл қай ауыл, ақырғы ауыл,

Жолбелгінің қарашы оқылмауын.

Құс қанаты талғандай шалғай түздің,

Құс қанаты күйгендей лапылдауын!

Сары дала сыйдиған, еті қашқан,

Жарлы төбе, жесір қыр, жетім аспан.

Жатқан жері бабамның демесе жұрт,

Тұрмайтыны баланың екібастан!

Көлшігі бар аядай, бір-ақ ұрттам,

Бүк түсіпті сол тұсқа бұралып тау.

Маған қарап қария кемсеңдейді,

Қалаға кеткен ұлға шырамытты-ау!..

 

2.

«Осы маңда ел жатқан» деді маған, –

Деді маған ел жақтан коңыр адам.

Өзі өмірден ештеңе сұрамапты,

Сұрамапты ештеңе өмір одан.

Аласы да жоқ екен, бересі де,

Алданбапты дүниенің елесіне.

Қалатынын ұқпадым үнсіз неге,

Алатынын білмедім нені есіне?!

Бір күрсініп алып ол терең ғана,

«Кеп тұр» дейді, білмеймін, келем бе, аға?!

Сенде бары – осы ауыл жайлы естелік,

Менде бары – мұңдылау өлең ғана!

Аң қараймыз дей ме екен қырға шығып,

Қалмағанын білем ғой құр да шілік.

...Осы құмнан жаралған қос қоңырым,

Бірте-бірте барады құмға сіңіп...

 3.

Ойлап келем әрнені, ойлап келем,

Ауылыңа жетем деп қай жақпенен.

Түзге батып барады қара жолдар,

Күзге батып барады Ай баппенен.

Ой, қара жол ұзайды шиырлана,

Ширатайын деді ме қиыр дала.

Бірде қыз боп билейді тыр жалаңаш,

Бірде құс боп айналар құйын ғана.

Ой, қара жол, қара жол, қалай барам,

Қара да жоқ жол бойы қарайлаған?!

Боз далада бейуақ бөрі ұлыған,

Бөрі емшегін тартқылап бала ойнаған.

Қыр басынан құлдилап көш құлайды,

Көшкен жұрттың көзінен жас бұлайды.

Арасынан салт атты суыт шығып,

Қамшысымен құйынды осқылайды.

Қандай бала, құдай-ау, кайдағы адам,

Қос көрді ме бұл көзім айдаладан?

Қырға шығып қарасам... қалың қопа,

Жұрт түгілі, жын-пері жайламаған.

Жортпаған жон, дөңес жоқ торымаған,

Алыс болды-ау бұл жұрттың жолы маған.

...Балбал тасқа сүйеніп, қалғып кетіп,

Көзімді ашсам: көк қала, қалың адам...

cурет:anadevis.blogspot.com

Жолдаған: Бағашар Тұрсынбайұлы

7663 9
Рейтинг: +7

Дайындаған: Ла Лига
Қосылған күні: 30 қазан 2012, 13:27
Пікірлер
+0
30 қазан 2012, 12:19

адеми олен жолдары

+0
30 қазан 2012, 12:23

Ерлан Жүністің осы өлеңдерін оқып, ерекше толқыдым. Ерланның осы өлеңді жазып отырғандағф жанының ауырғанын сезіне алар ма екенбіз? сезіне алмасақ та, осы өлеңдері үшін бағалайықшы. Ерлан аға, осы өлеңдеріңізбен өзіңізді құттықтайыншы.

+0
30 қазан 2012, 12:40

Ақын ағаның қандай тебіреністе жүргені мәлім болды. Ақынның өлеңдерін іздеп жүріп оқитын оқырмандар тағы бір сырласын тапқандай қуанары анық. Жүректің қылын шертіп, баяу сазбен баянсыз ғұмырдың қалтарыс-қырларын дөп бере алған ағамызға алғыстан басқа айтарымыз жоқ... Өзіңізді жалғызбын деп санамыз, артқы толқын інілер сізбен бірге...

+0
30 қазан 2012, 12:58

кереметттт

+0
30 қазан 2012, 13:45

беу! Соңғы жолдардағы интерпритациясы керемет. қазақы иіс мұрынды жарып барады. "Жолжазбасы" енді менің сүйіп оқитын өлеңім!

+0
30 қазан 2012, 14:20

Ерлан Жүністің поэзиясы бір төбе ғой. "Өзімде өзімнің мұңым, Өзіме уым да балай. Жылағым келеді бүгін, ешкімді жылатып алмай" Өзге ақындарды қайтам, Ерлан Жүністің поэзиясы тарихта қалатынына сенем, мектептің әдебиет оқулығынан өлеңдерін көргім келеді. Тек... Тек қана өлең жазумен айналысса екен ағамыз!

+0
31 қазан 2012, 15:54

Тамаша өлеңдер! Ерлан өзі жасаған қалыпта тоқтап қалмай, бірден-бірге көшіп отыратын ақын ғой. Міне бүгінге дейін соңынан қаншама оқырман ертті. мұның өзі жас ақын үшін зор бақыт. осы өлеңдерді оқып отырып, бұрынғы жинақтарынан өзге, мүлде жаңа тағы бір жол салып келе жатқандай сезіндім. Ереке, қалам қарымды болғай. Жазар көбейсін!

+0
31 қазан 2012, 16:11

"Жаз да өтті, сұлу салған ән сыңайлы,
«Қош» деуге қалай енді жан шыдайды?!"...

..."Жаздың соңғы түндері-ай, қайтем сені,
Әр тамшының көзінде жәутеңдеген?!" шөлдеген көңілге сөз саумалын қылық қылық көмекейлете жұтсаңда қанбайтыны, тәйірі, рас емес пе?! жұта бергің келеді...жігіттер бұл жерде поэзия туралы айытпайықшы. өлеңдер жайлы айталық. бірі дара, бірі жалпылық ұғым. соны ескерсек тамаша өлеңдер шеруі...

+0
01 қараша 2012, 10:15

поэзия жалпы, өлең жалқы ұғым деп Аманхан ағаның теориясының мәнін түсіне алсамшы. Қозеке, досымсың ғой, поэзия дегенде көзіңе өлең елестеп, өлең дегенде поэзия ғой деп ойлайтын шығарсың. Ерланның өлеңі Ерланның поэзиясы емес пе? Әлде прозасы ма?

Пікір білдіру:

Пікір қалдыру үшін тіркеліңіз немесе сайтқа кіріңіз.

Әлеуметтік желі арқылы кіру:

Соңғы аудармалар

EXO - Lucky One [kaz_sub]
EXO - Lucky One [kaz_sub]

Оңтүстік кореялық әйгілі бойз-бэнд EXO тобы бүгінде дәурені жүріп, дүркіреп тұрған топ болып отыр. Жігіттер тобы тек Оңтүстік Кореяда ғана емес, Азияда танымал. Қазақстанда да EXO тобының жанкүйерлері жетерлік. Басында он екі қатысушыдан құралғанымен, бүгінде топта он өнерпаз өнер көрсетеді. Әр қатысушы жан-жақты, талантты. Біз бұған дейін аталған топтың бірнеше бейнебаянын қазақшаға аударған едік. Назарларыңызға топтың "Lucky One" туындысын қазақша субтитрмен ұсынамыз. Аударған: Жарылқасын Мырза Тайминг,...

IU - The shower [kaz_sub]
IU - The shower [kaz_sub]

Ли Чжи Ын – оңтүстік кореялық 23 жасар әнші қыз. Оның сахналық есімі «I and You» (мен және сен) әуен арқылы бір бүтін бола аламыз дегенді білдіреді....

Күн ұрпақтары/ Сошедшие с солнца / Descendants of the Sun [kaz_sub]
Күн ұрпақтары/ Сошедшие с солнца / Descendants of the Sun [kaz_sub]

Ел: Оңтүстік Корея  Жанр: романтика, медицина, драма, комедия, боевик  Жыл: 2016  Режиссер: Ли Ын Бок Басты рөлдерде: Чжин Гу, Сон Хе Ге, Сон Джун...