Керікпен бір күніңізді өткізуге қалай қарайсыз?

09 қаңтар 2013, 12:04

Кениялық Giraffe Manor қонақ үйі - жан мен тән тыныштығын ғана емес, тірі табиғатпен ғажап қарым-қатынасты сыйлайтын Жер шарындағы бірден-бір мекен. Бұлай дейтініміз, ғимарат бірнеше жылдардан бері құрып кетуге шақ қалып тұрған керіктерге пана болып келеді. Уақытша тұрғындар әр таң сайын ерекше көріністің куәгері бола алады: қонақ үй ауласына еркін жіберілген керіктер еш жатырқамастан есік пен терезеден үңіледі.

Қонақ үй терезелері мен есіктері әрқашан ашық. Басын сұққан керім керіктерге тағам ұсынып, суретке түсуге әбден болады.

Бұл жай Дэвид Дунканның бастамасымен 1962 жылы Кенияның астанасына таяу маңдағы Найроби қаласында тұрғызылған болатын. 1960 жылдары үйдің қожайындары бірнеше рет өзгерді. Ақырында, 1974 жылы шотландиялық Джок Лесли-Мелвил есімді шаруа мен оның Бетти есімді америкалық әйелі бұл ғимаратты сатып алады. Аз уақыт өткен соң Лесли-Мелвил жоғалып бара жатқан жабайы жануарлардың африкалық қорын құрады.

Ерлі-зайыптылар алғашында керіктің екі баласын асырып алған болса, бірнеше жылдардан кейін олардың саны көбейеді.

Giraffe Manor-да тұрғындарды қабылдап, қонақ үйге айналдыру туралы ой Беттидің басына күйеуі қайтыс болған соң ғана келген. Бүгінде ол Африка жеріне аяқ басқан туристердің соқпай кетпейтін мекеніне айналып үлгерді. Қонақ үйде алты ғана бөлме бар болғандықтан, керіктермен ашық қарым-қатынас жасау екінің бірінің басына беріле бермейтін мүмкіндік.