29 жыл бойы тек қызыл түсі жанып тұрған бағдаршам

Күнделікті қалалардан көріп жүрген бағдаршам қарапайым адам үшін қатты бір маңызға ие болмауы мүмкін. Алайда, екінші жағынан қарасаңыз жол жиегіндегі миллиондаған көлікті реттеп жүргізуде бұл қондырғының жасап жатқан жұмысы ерен. Бағдаршам жайлы не білесіз? Қызықты деректерді тізіп көрсек. 

Германия мемлекеті бүгінгі таңдағы экономикасы жоғары елдердің алдыңғы санатына жатады. Олар шығарған әрбір тауар әлем бойынша үлкен сұранысқа ие. Сонымен қатар мұнда ескі ғимараттар мен ерекше дүниелер де жетерлік. Барлығының парқын білетін немістер тағы бір ерекшелігімен елді таңғалдыруда. Германияның Дрезден қаласында 1987 жылдан бері бір рет түсін өзгертпеген бағдаршам жұмыс жасауда. Тек қана қызыл түсті көрсетіп, тіке және солға қарай көлік жүруге тыйым салып оңға ғана бұрылуға мүмкіндік береді. Цигельштрасс көшесінде орналасқан ерекше бағдаршамға жергілікті тұрғындардың бойы үйреніп кеткен. Ұзақ уақыт қызыл жанған бағдаршам бүгінгі таңда туристердің қызықтап көретін мекеніне айналуда.

Ал ең бірінші бағдаршам 1914 жылы американың Кливленд қаласында орнатылған. Оны жасаған инженердің есімі – Лестер Вайр. 

Ғалымдардың зерттеуі бойынша үлкен мегаполисте тұратын тұрғындар бір жылдың алты айға жуық уақытын бағдаршамның жасыл түсін күтуге жұмсайды екен. 

1920 жылы американың Нью-Йорк және Детройд қалаларында бірінші рет үш түсті бағдаршам орнатылған. 

Жапон елі қашан да өзінің озық үлгідегі технологияларымен жұртты таңғалдыратыны жасырын емес. Сол секілді мұндағы ең алғашқы бағдаршамның жасыл түсінің орнына көк түс пайдаланылған. Арада ұзақ жыл өткеннен кейін, көк түстің жүргізушілер назарына қатты іліне бермейтіндігі ескеріліп, жасыл түске өзгертілген. 

Бразилияның Рио-де-Жанейро қаласы қылмыскерлерге толы екендігін әлемнің көптеген тұрғыны біледі. Сол себепті кешкі сағат 22:00-ден таңғы 5:00-ге дейін мұнда қызыл түске жүре беруге рұқсат етілген. Бұл әрекет қылмыстың алдын алу үшін әдейі жасалған.

Қытайдың Пхеньян қаласына бір кездері бағдаршам орнатылмаған. Оның орнына жол бағдарын қыздар атқарып отырған. Аталған кәсіпке жас әрі сүйкімді сұлулар таңдалған. Қазіргі уақытта Пхеньян көшесіне бағдаршам ілінді.