Брайан Бергтің сәулет өнері

14 маусым 2012, 11:38

Cегіз жасынан бастап, картадан үйшік салып, одан бермен 30 жыл көлемінде карта десе, ішкен асын жерге тастап келген, шын мәнінде еңбектенуден еш жалықпайтын бір талант иесі бар. Карта әлемінде бұл талант иесін білмейтін адам кем де кем шығар. Ендеше, сіздердің назарларыңызда картадан салынған ең үлкен үйдің (7,93 метр) және көптеген сәулет өнерінің авторы- Брайан Берг.

Саусағының бүрі бар талант иесі Гарвард университетінен тәлім алған. Және Брайан кез келген шығармашылығын жалаң шабыттың шеңберінде емес, асқан нәзік шеберлікке сүйеніп жасайды. Мәселен, архитектуралық композициясын белгілі бір геометриялық құрылымға сүйеніп, алдын ала кесіп-пішіп алады.

Суреттегі Макао ойынханасы мен қонақүйі. Мұны соғу үшін 44 күн мен 219 мың карта кеткен.

Даллас орталығындағы зеңгір үйлер. Осы бір еңбегіне Берг 1060 карта колодын жұмсаған. Сол арқылы 2007 жылы әлемдік рекорд орнатылған-ды.

Бұл суретте шебердің ең күрделі шығармасы - 2008 жылы салынған Олимпиада кешені және Пекиндегі ұлттық "Құс ұясы" стадионы.

Бұл сурет - 2005 жылы "Қайырлы таң, Америка" бағдарламасында көрсетілген Нью-Йорк қаласының пейзажы. Брайан бұл еңбегін қайырымдылық мақсатында, нақтысын айтсақ цунамидің кесірінен зардап шекен халыққа көмек ретінде жасап шыққан.

Брайан өз еңбектерін үлкен төзімділікпен, асқан қажырмен жасайды. Кез келген картаны "тисе - терек, тимесе - бұтақ"-дегендей қалай болса солай қоя салмайды. Және арнайы жүйемен, ерекше бір ыждағаттылықпен жасап шығады.

Ең бастысы Брайанның кез келген туындысы тек қана картамен соғылады. Сонысына қарамастан, жайдан-жай құлай салмайды. Бұған дәлел өзі салған үйінің үстінде қозғалтқышты қосқан. Бір қызығы үй міз бақпай тұра берген. Сосын Брайан өз соққан үйлерді желдеткішпен құлатқанды жақсы көреді екен. Өз сөзіне сенсек, ол туындысын орындау жолында ғана емес, құлатып жатып та тәжірибе жинақтайтын көрінеді.

Holiday Inn Keycard қонақүйінің бір бөлмесі. 2009 жылы Нью-Йорк пен Вашингтонда көрсетілген. Бір қызығы, аталған туындыны пластикалық картаның көмегімен жасаған.