Қазақстан әскері Ресейден жүлдемен оралды

Қазақстан әскері Ресейден жүлдемен оралды

Қазақстан қарулы күштері әскери тарих білімінен ТМД елдерінің алдына шықты. Бұл туралы Massaget.kz тілшісі республиканың қорғаныс министрлігінің баспасөз қызметіне сілтеме жасай отырып хабарлады.

Мәскеуде Халықаралық әскери-кәсіби шеберлікті сынға салған "Достастық жауынгері" конкурсы аяқталды. "Қатысушылардың әскери тарихты, 1941-45 жылдары өткен Ұлы Отан Соғысы батырларын қаншалықты білетіндігін байқау үшін жүргізілген "Эрудит" викторинасында Қазақстан әскері жеңіске жетті", - деп хабар таратты баспасөз қызметі.

Ведомствоның ақпараты бойынша, конкурсқа ТМД-ның ең мықты солдаттары, матростары мен старшиналары қатысты. Қазақстан әскерінің атынан "Қазақстан Республикасы Қарулы Күштерінің үздік сержанты 2011" байқауының жеңімпаздары Мереке Қожағалиев, Асқар Кеңесжанұлы, Нұрқабыл Ерпейісов және Зульфия Уәлиева шықты.

ва

Конкурс қатысушылары

5 күн бойы жүргізілген сайыс 5 бөлімнен тұрды. "Атлет" жарысында әскери-спорттық шеберлік сынға алынса, "Профессионал" және "Снайпер" байқауында әскери дайындық еленген. "Эрудит" викторинасында әскери тарих білімі есепке алынды. "Кавалер" ("Сударыня") конкурсында әскерилер бойында бар өнерлерін көпшілік назарына ұсынды. "Кавалер" ("Сударыня") байқауында қазақстандықтар 3-орыннан көрінсе, "Профессионал" сайысында қола жүлдеге ие болды. Нәтижесінде отандастарымыз 7 мемлекеттің арасынан үшінші орынға тұрақтады.

"IV Халықаралық "Достастық жауынгері" әскери-кәсіби шеберлік байқауының соңында Ресей Федерациясының қорғаныс министрінің бұйрығы бойынша, қазақстандық әскердің өкілдері "Әскери достастықты нығайтқаны үшін" медальдарімен марапатталды. Сонымен қатар, естелік сыйлықтар, дипломдар, грамоталар табыс етілді", - деп қорытындылады министрліктің баспасөз қызметі.

Дайындаған: Еркебұлан Қайрахан

сурет: ©Каир Дунбаянов