Қыстағы аяқ күтімі

Қыста жабық аяқ киім киетіндіктен, аяқтарымызды ешкім көрмейді-ау деп оған қажетті күтім көрсетпейміз. Көктемде аяқтарыңыздың жағдайынан шошымайын десеңіз, қазірден бастап аяққа көңіл бөліп, "қыстық" күтім көрсетіңіз.

• Қыстық аяқ киімді мұқият таңдаңыз. Ол ыңғайлы, аяқты қыспайтын болуы керек. Сонда аяғыңыз да зақымданбайды.
• Аяқ киіміңіз табиғи былғарыдан болмаса, табиғи материалдан жасалған ұлтарақ салып не мақталы шұлық киіңіз. Табиғи маталар теріңізге дем алуға мүмкіндік беріп, артық терлетпейді.
• Қыста аяқтарыңыз шамадан артық терлейтін болса, аяқтарыңызды суық сумен шаюды әдетке айналдырыңыз. Ол аяқтың терлегенін басады.
• Суға түскен сайын кеуектаспен аяқты қырып жүріңіз. Оның алдында 5-10 минут аяқты суға жібітуді ұмытпаңыз. Осылайша аяқ терісін зақымдаулардан сақтайсыз.
• Осындай дауадан кейін аяққа құрамында Е дәрумені бар крем жағыңыз. Ол теріні сыртқы ортаның жағымсыз әсерінен сақтайды.
• Педикюр жасағанда ерекше мұқият болыңыз. 
• Апта сайын аяққа арналған маскалар жасап тұрыңыз. Мысалға құрамында Е дәрумені бар косметикалық майды аяққа жағып, сыртынан шұлық киіп жатыңыз.

Дайындаған: Сания Аринова

Сурет: dourody.pl