Бойы қысқа адамдар ұзақ өмір сүреді екен

АҚШ мамандары бойы қысқа адамдардың ұзақ өмір сүретіндігін айтуда. Осыны дәлелдеу мақсатында Гавай университетінің ғалымдары жапондық ата-бабасы бар бірнеше мың американдықтарды бақылаған. Және адам бойы мен оның өмір сүру мерзімінің байланысын анықтаған.

Анализ нәтижесі бойы 163 сантиметр болатын адамдарға қарағанда бойы 158 сантиметрден аспайтын адамдардың өмір жасы ұзақ болатынын көрсеткен. Бұл экспериментті жүргізуші мамандардың бірі Брэдли Уилкокс зерттеудің бойы 152,2 сантимтреден бастап 183 сантиметрге дейін жететін адамдар арасында жүргізілгенін айтады.

Ғалымдар мұның барлығын адам генімен байланыстырады. Бойы қысқа адамдардың бойында «FOX3» сынды гені болады екен. Ал ол өз кезегінде қандағы инсулин мөлшерін бақылап, көтеріліп кетуіне мүмкіндік бермейді. Мұнымен қатар бұл ген ісік ауруына шалдығу мүмкіндігін төмендетеді.

Гавай университетінің мамандары өз болжамдарын ғылым деңгейінде дәлелдегенімен, мамандар бұған сын көзбен қарауда. Дәл қазір бұл болжамның басқа халықтар үшін жарайтындығы белгісіз болып отыр.