Дұрыс жуыну ережелері

Дұрыс жуыну ережелері

Теріге зақым келтіріп алмас үшін жуыну ережелерін мұқият ұстану қажет. Дұрыс тазаланбаған клеткалар бактериялардың өршуіне, әжім мен безеулердің пайда болуына әкеледі.

• Бөлме температурасындағы сумен жуыныңыз. Қылтамырлардың кеңеюін өршітпеу үшін су ыстық болмауы қажет. Бірақ суық сумен де жуынбауды ұсынамыз, өйткені ол макияж қалдықтарын кетіре алмайды.

• Жуынуға арналған құралдардың мөлшерін есепке алыңыз. Егер гель пайдаланатын болсаңыз, онда құралдың кішкене бөлігін (бұршақ мөлшеріндей) дымқыл қолыңызға құйып алып, көпіртіп, бетіңізге ақырын уқалап жағыңыз. Теріңізде созғылап, қатты баспаңыз. Үздік нәтиже үшін арнайы губка немесе спонж пайдалансаңыз болады.

• Егер сүтше қолданатын болсаңыз, онда кішкене бөлігін (шамамен 5 мл) дымқыл дөңгелек мақтаға немесе саусақтарыңыздың ұшына құйып алып, бетіңізге жағыңыз. Беттің орталық бөлігінен шетке қарай массаж сызықтары бойынша қозғалыңыз. Сүтше қалдықтарын сумен шайып тастаңыз.

• Теріні тазартуды ұмытпаңыз. Теріні күніне екі рет, таңертең және кешке тазарту керек. Таңертең тері қабатынан түні бойы жиналған себумды жуасыз, кешке – макияжды, терінің бетінде жиналған кірді, себумды. Қабынуға бейім, майлы тері болса, әсіресе ыстық кезде бөртпенің алдын алу үшін күніне 3-4 рет жуыну ұсынылады.

• Теріні терең тазарту процедураларын жасап тұрыңыз. Терінің дұрыс демалуын қайта қалпына келтіру үшін және терінің қуаттылығын арттыру үшін, сонымен қатар реңін жақсарту үшін кейде пилинг арқылы теріні терең тазартып тұрыңыз. Олардың құрамында өсімдік сығындылары мен жеміс қышқылдары болуы мүмкін. Майлы тері үшін терең тазарту процедурасын аптасына 2 рет жасау ұсынылады, аралас тері үшін – аптасына 1-2 рет, құрғақ және жасы ұлғайған тері үшін – аптасына 1 рет. 

Дайындаған: Анар Мұстафина

Сурет: www.webmd.com

Оқи отырыңыз:

Бет жууға арналған құралдарды қалай таңдау керек?

Бет терісінің өңін мінсіз ету үшін...

Күнделікті бет күтімінің 10 ережесі

 

 


A. Mustafina