Жұмыс уақытында сергудің жолдары

Кейде жұмыс күнінің екінші жартысында шаршаудың салдарынан шаруаларымызды атқаруға ерік-жігеріміз жетпей жатады. Соның себебінен бүгін орындауға тиіс жұмыстарды үнемі кейінге қалдыруға тура келеді. Мұндай жағдайлар орын алмас үшін жұмыс уақытында өзіңізді сергітудің бірнеше тәсілдері бар.

1. Жеңіл жаттығулар. Егер  компьютер алдында ұзақ отырсаңыз, арқаңыз бен аяқтарыңыздың талғанын байқайсыз. Ал орныңыздан тұрып бір-екі жаттығуды жасауға уақытыңызды қимайсыз. Мұндай жағдайда орныңыздан тұрмай-ақ денеңіздегі шаршаудан арылуға болады. Ол үшін аяғыңызды еденнен көтеріп, алға қарай созыңыз. Аяқтарыңызды дәл осы қалпында барынша ұзағырақ көтеріңіз. Осылайша сіз ағзаңыздағы қанайналым жүйесінің белсенді жүруіне ықпал етесіз.
2. Су ішу. Ағзадағы судың мөлшері 1-2 % төмендесе, бұл ойлау процесінің қалыпты жүзеге асуын тежейді.  Сондықтан, суды аз мөлшерде, бірақ жиі ішуді әдетке айналдырыңыз.
3. Терең тыныс алу. Қарапайым тыныс алу жаттығуларын жасау – сергудің ең оңай жолы. Ол үшін дәлізге шығып, жүріп келе жатқан қалпыңызда терең тыныстаңыз. Алдымен деміңізді ішке тартып, содан кейін барынша сыртқа шығарыңыз. Жаттығуды бірнеше рет қайталаңыз.
4. Тек жақсы нәрселерді ойлау. Ғалымдардың дәлелдеуінше, үнемі жақсы нәрселерді ойлау адамның ынта-жігерін арттырады. Сол себепті, көңіл-күйіңізді түсіретін ойлардан аулақ болыңыз.

Дайындаған: Гүлнұр Бақытбекова

Сурет: postila.ru, vrn-today.ru