15 сәуір. Мерекелік фильмдер. Қыз-жігіт

Мерекелік фильмдер сериясын жалғастырамыз.

Біз ұсынатын келесі фильм - Қыз-Жігіт.

Оқиға желісі бойынша, жас колхозшылар, шабандоз Айдар мен жылқы зауытының жұмыскері Ғалия екеуі бір бірін бұрыннан ұнатады. Күндердің бір күнінде екеуі болмашы бір себептермен ренжісіп қалады.

Ғалияны ұнататын дүкен меңгерушісі Аңғарбай осы сәтті пайдаланып, оны өзіне қалыңдық еткісі келіп, ниет білдіреді.

Айдардың арманы — өз колхозында асыл тұқымды жылқылар ұстау, бірақ оның әкесі, колхоз төрағасы бұған қаржы бөлуден бас тартады. Сондықтан Айдар колхоздың аттары шынымен нашар екенін әкесіне дәлелдегісі келеді. Осы оймен ол ат жарысында Ғалияны алға жібермекші болады. Ал Ғалия болса, өз сүйіктісінің озып келуін қалайды. Ежелгі дәстүр бойынша, озып келген жігіт қыздың бетінен сүюі керек. Бірақ Ғалияның ойлағаны болмай, Айдар ең соңында келеді.

Бұдан кейін Айдардың жеңілісі әкесіне ой салып, асыл тұқымды жылқылар алуға қаржы бөледі. Бірақ жас жылқышының сүйіктісі көпке дейін оған көз қырын да салмай қояды.

Өндіруші: Алматы көркем және хроникалық фильмдер киностудиясы